შექმენი შენი ტური
18-05-2018

საქართველო თხილამურსა და სნოუბორდში მსოფლიო ჩემპიონატს უმასპინძლებს !

საქართველო თხილამურსა და სნოუბორდში თავისუფალი სტილით სრიალში 2023 წლის მსოფლიო ჩემპიონატის მასპინძელი ქვეყანა გახდა. ამის შესახებ ინფორმაციას საქართველოს პრემიერ-მინისტრი გიორგი კვირიკაშვილი „ფეისბუქის“ საკუთარ გვერდზე აქვეყნებს.

გადაწყვეტილება საბერძნეთში, კოსტა ნავარინოში საერთაშორისო სათხილამურო ფედერაციის კონგრესზე გამოცხადდა. მასპინძლობის კანდიდატი მხოლოდ საქართველო იყო.

მსოფლიო ჩემპიონატი ბაკურიანში ჩატარდება.

კონგრესის ქართულ დელეგაციაში საქართველოს კულტურისა და სპორტის მინისტრი მიხეილ გიორგაძე, ასევე მთის კურორტების განვითარების კომპანიის ხელმძღვანელი სანდრო ონოფრიშვილი არიან.

მსოფლიო ჩემპიონატის საქართველოში ჩატარებასთან დაკავშირებით, მთის კურორტების განვითარების კომპანია ინფრასტრუქტურული პროექტების განხორციელებას ჯერ კიდევ 2017 წელს აანონსებდა.

ზამთრის კურორტების ინსპექტირების მიზნით, საქართველოს რამდენიმე თვის წინ FIS-ის ექსპერტი ჯონ ფიტჯერალდიც ეწვია, რომელმაც გუდაურისა და ბაკურიანის დათვალიერების შემდეგ, საქართველოში ზამთრის სპორტის განვითარების პერსპექტივები დადებითად შეაფასა.